Hakmarrje politike e quajti Andi Lila kërkesën e Ministrisë së Jashtme për futbollistët e Euro 2016 që të dorëzojnë pasaportat diplomatike.
Ish-futbollisti i Kombëtares u shpreh në rrjetet sociale se ky vendim erdhi pasi ju dhurua bluza e Kombëtares kryedemokratit Lulzim Basha.
Për këtë të fundit, Lila ka siguri të plotë se do të rikthejë pasaportat diplomatike për futbollistët në shtator, kur të krijojë qeverinë e tij.
“Në 2016 nga Kryeministri u pritëm me ceremoni shtetërore për rezultatin historik sportiv, pasi dërguam Shqipërinë në Europian. Ndërsa sot, vetëm për faktin se futbollistët e kombëtares i dhurojnë bluzën e kombëtares z.Lulzim Basha, ju kërkohet nga zyrtarët e kësaj mazhorance që të dorëzojnë pasaportat diplomatike. Kjo sjellje inatçore nuk mund të jetë standardi i sjelljes së një shteti demokratik që aspiron për tu bërë anëtar i BE-së. Sigurisht që ata që tallen me sportistët, që i duan ata vetëm për ti përdorur sportistët si fasadë për propagandën e tyre të dështuar do të marrin ndëshkimin me votë nga sportistët. Këto pasaporta, që si një hakmarrje e ulët po ju hiqen sot futbollistëve , do t’ju rikthehen menjëherë në shtator 2021 si një nga vendimet e para që do të marrë qeveria e Kryeministrit Basha. Sot çdo sportist e ka kuptuar se, edhe në sport ka ardhur koha për ndryshim, ndryshim që do të vijë më datë 25 Prill”, tha Lila.
Nga ana e saj, ministrja Olta Xhaçka shpjegoi se pasaportat diplomatike skadojnë njësoj si mjetet e tjera të identifikimit dhe shtoi se po bëhet shumë zhurmë për asgjë.
