Pas debateve të gjata që pamundësuan arritjen e dakordësisë, Komisioneri Shtetëror i Zgjedhjeve dhe më pas Komisioni Rregullator do të mblidhen pasdite për të miratuar fletën e votimeve që do të përdoret në 25 Prill.
Në mbledhjen e të martës, Celibashi i propozoi Komisionit Rregullator 3 nga 5 variante të fletës së votimit, të shqyrtuara deri më tani. Por në mungesë së dakordësisë u vendos që mbledhja të shtyhej për 24 orë dhe Komisioneri të vinte me një propozim të vetëm.
Aktualisht palët politike janë të ndara në preferencat e tyre për fletën e votimit. PS mbështet variantin ku kandidatët të renditen me numra në fletën e përdorur në Kosovë ndërsa të djathtët variantin ku çdo kandidat të ketë emrin në fletën e votimit.
Sipas “klan”, Celibashi pritet të propozojë edhe një variant tjetër, ku në 11 qarqe të ketë listë me emra dhe në Tiranë lista të jetë me numra.
Nëse Komisioni Rregullator nuk e miraton këtë variant, atëherë vendimi do t’i kalojë Kolegjit Zgjedhor.
