Numri 08004040 është në dispozicion për të gjithë të moshuarit të cilët duan të bëjnë vaksinën por nuk njohin mjekun e familjen dhe ndërkohë kërkojnë një kontakt me të dhe informacion lidhur me këtë proces.
Mirela Cami, drejtoreshë e Operatorit të Kujdesit Shëndetësor thotë se nëse ata do të telefonojnë këtë numër, sipas emrit të regjistruar do mësojnë edhe se kë kanë mjek të familjes dhe më tej do jetë mjeku i cili do të fusë në listë dhe do të dorëzojë emrat sipas radhës për të kryer vaksinën.
Ndërkaq procesi i vaksinimit masiv ka nisur sot në Sheshin “Skënderbej” dhe do të vijojë deri në orën 17:00 të pasdites. E njëjta do të funksionojë edhe në rrethe si në Elbasan dhe Shkodër. Ndërsa në qytetet më të vogla, procesi do vijojë në qendrat shëndetësore.
“’Në qendrat shëndetësore po vaksinohen grupmoshat plus 80. Të gjithë mjekët e familjes janë në komunikim me të moshuarit dhe të moshuarit kanë kontaktuar mjekun e familjes dhe nëse janë në këtë grupmoshë njoftohen në fasha orare, për të ardhur tashmë në sheshin Skënderbej.
Ka një orë të caktuar, mjekët e familjes i kanë njoftuar të gjithë pacientët për fashën orare. Vaksinimi do të vijojë deri në orën 17:00. E njëjta gjë do të funksionojë edhe në rrethe. Kemi vaksinim masiv të përqendruar në Tiranë, Elbasan, Shkodër, në qytet më të vogla do të vijojë në qendrat shëndetësore. Kemi thënë për numrin 08004040 ku çdo individ që nuk e njeh mjekun e familjes mund të informohet se kush është mjeku i tij i familjes”, tha Mirela Cami.
