Pas shqetësimeve të ngritura prej ditësh mbi efikasitetin e vaksinës AstraZeneca dhe efektet e mundshme anësore, vjen reagimi i Organizatës Botërore të Shëndetësisë.
OBSH thotë se vendet nuk duhet të ndalojnë së përdoruri vaksinën anti Covid-19, AstraZeneca nga frika se shkakton mpiksje të gjakut pasi nuk ka asnjë indikacion se shkaktohet nga vaksina.
Bullgaria, Danimarka, Italia, Islanda dhe Norvegjia janë ndër vendet që kanë ndaluar përdorimin e kësaj vaksine pasi regjistruan raste të të vaksinuarve të cilët patën probleme me mpiksjen e gjakut, dhe në Danimarkë një ditë më parë ndërroi jetë një grua 46 vjeçe.
Por zëdhënësja e OBSH-së deklaroi pak më parë në konferencë se nuk ka asnjë lidhje midis vaksinës dhe një rrezik në rritje për zhvillim të mpiksjes së gjakut.
Margaret Harris tha se vaksina është e shkëlqyer dhe duhet të vazhdojë të përdoret.
Rreth 5 milion evropianë kanë bërë tashmë vaksinën e AstraZeneca. Ka pasur rreth 30 raste në Evropë të incidenteve shëndetësore tromboembolike – ose zhvillim të mpiksjes së gjakut – pas injektimit të vaksinës.
Pati gjithashtu disa lajme se një 50-vjeçar kishte vdekur në Itali pasi bëri vaksinën, dhe shkak u bë tromboza.
OBSH po heton ngjarjet por deri më tani nuk rezulton lidhje mes vaksinës dhe këtyre ngjarjeve.
Agjencia Evropiane e Barnave tha më herët se nuk kishte asnjë indikacion se vaksina po shkakton mpiksjen e gjakut.
Vetë zyrtarë nga kompania AstraZeneca kanë deklaruar se siguria e ilaçit është studiuar gjerësisht në provat klinike. Vende të tjera, duke përfshirë Briitaninë, Gjermaninë, Australinë dhe Meksikën, kanë thënë se po vazhdojnë shpërndarjen dhe injektimin e AstraZenecas mes popullatës.
Në Britani, më shumë se 11 milionë njerëz kanë marrë të paktën një dozë të vaksinës dhe nuk ka pasur asnjë rast vdekje apo mpiksje të gjakut.
