Kreu i Urgjencës kombëtare, Skënder Brataj tha sot se është normale që të krijohen radhë pritjeje ambulancash në spitale, pasi jemi në një pandemi. Ai tha se pritja është një proces vlerësimi për gjendjen shëndetësore të pacientëve dhe jo sepse nuk ka më hapësira në spitale. Aktualisht, tha Brataj, jemi në skenarin e tretë të pandemisë, dhe ka ende kapacitete për të përballuar fluksin. Por nëse do të ezaurohen të gjitha skenarët, u shpreh më tej Brataj, edhe në Shqipëri, do të bëhet ashtu sikurse në botë dhe pacientët do të trajtohen edhe në stadiume.
“Po flasim për pandemi, deri tani janë ezauruar disa prej skenarëve dhe aktualisht jemi në skenarin 3. I mbaj mend ambulancat pa asnjë aparaturë që ishin më përpara. Sa i përket pajisjes së tyre dua të them që janë minispitale që lëvizin. Nuk ka ende ezaurim, nuk jemi në atë pikë. Por patjetër krijohet radhë nga kërkesat e shumta, dhe pritja është një proces vlerësimi për gjendjen e pacientëve. Do hapet covid 4 dhe ato rajonale. Nëse i ezaurojmë të gjitha skenarët, pastaj pacientët do i trajtojmë edhe në ambulancë, edhe në shtëpi, edhe në hotele, edhe në korridore, por edhe në stadiume siç e bën edhe gjithë bota. Qytetarët do asistohen me çdo mënyrë, qëllimet e tjera në këtë moment jashtë aspektit shëndetësor, duhet vetëm të heshtin”, tha Brataj.
