Fatmir Hysenbelliu infektohet me Covid-19. Lajmin e bën të ditur vetë ai përmes një postimi në Instagram. Ish-futbollisti shprehet se, tani është në karantinë dhe fatmirësisht nuk ka asnjë simptomë të sëmundjes. Hysenbelliu u bën thirrje të rinjve të vetëpërmbahen dhe të bëjnë shumë kujdes në këto ditë të vështira për shkak të pandemisë.
“Të nderuar miq! Sot dua të ndaj me ju një mesazh të rëndësishëm, që ndonëse personal, në këto ditë të vështira impakton secilin prej nesh. Në mënyrë rastësore, pa konstatuar asnjë simptomë, kam kryer ditët e fundit testin COVID, ku kam rezultuar pozitiv. Menjëherë sapo jam informuar për rezultatin e testimit jam vetëkarantinuar dhe kam ndërprerë ç’do kontakt me bashkëpuntorët dhe miqtë e mi. Ndërkohë, edhe pse tërësisht asimptomatik, jam në komunikim të vazhdueshëm me mjekun për monitorimin e gjendjes. Në gjithë këtë situatë, duke qenë i ndërgjegjshëm për rrezikshmërinë e kësaj sëmundje të pabesë, sidomos ndaj personave më vunerabël, kam bërë maksimumin të ruaj familjen e të afërmit, bashkëpunëtorët e miqtë.
Doja ta ndaja këtë eksperiencë me ju, që t’i shtohem zërave që bëjnë thirrje për kujdes e vetëpërmbajtje, sidomos nga të rinjtë. Edhe kjo gjë është ajo çfarë do të kërkoja nga secili prej jush: ju lutem të bëjmë kujdes në këto ditë të vështira, të “sakrifikojmë” pak nga siguria që na jep mosha e të ruajmë njerëzit tanë të dashur! Është shumë bukur t’i kemi mes nesh çdo ditë e të ndajmë me ta gëzimet e përditshme, por shumë e dhimbshme të ngushëllojmë njëri-tjetrin me fjalë të zgjedhura në rrjetet sociale.
Ndaj le të përpiqemi pak sot që t’ia dalim të gjithë mbanë! Ju falënderoj nga zemra!”-shkruan Hysenbelliu.
