Leo Messi po luan sezonin e tij të fundit te Barcelona. Ylli argjentinas nuk e ka në plan që të rinovojë kontratën me katalanasit dhe pritet në verën e ardhshme të ndryshojë ekip. PSG, Manchester City dhe Interi duken ekipet që insistojnë më shumë për “pleshtin”.
Nga Spanja raportohen disa informacione që bëjnë me krahë tifozët e Interit. Gazetari i njohur spanjoll, Eduardo Inda bën me dije se “Suning” ka lëvizur gurët për të transferuar Leo Messin dhe ka bërë një ofertë shumë të rëndësishme në tavolinën e tij.
Leo do të largohet si futbollist i lirë (me parametra zero) dhe asnjë skuadër nuk duhet të paguajë për kartonin e tij. Duhet thjesht të bëjë ofertën e duhur financiare për të bindur Messin. Interi është i gatshëm dhe duket se e ka bërë këtë, i ndihmuar nga kompania që e menaxhon “Suning”. Priten zhvillime në muajt e fundit të këtij viti. Barcelona pritet të bëjë zgjedhjet në janar, por deri atëherë Leo Messi pritet të ketë oferta të shumta.
