Mungesa e një shqiptari në jurinë profesionale të Maqedonisë së Veriut për festivalin më të madh evropian, “Eurovision”, ka shkaktuar reagime shumë të mëdha brenda kufijve.
Redaktori i Televizionit Publik në gjuhën Shqipe, Avni Qaili në një prononcim ekskluziv për “News33”, fajsoi politikën për të gjitha ngjarjet e mbrëmshme. Ai tha se punojnjësit shqiptarë të shërbimit në gjuhën shqipe anashkalohen gjithmonë në këto lloj organizimesh, dhe theksoi se zgjedhjet bëhen direkt nga politika.
“Kjo nuk është hera e parë që manipulojnë. Këtë vit ndodhi për shkak të Darko Dimitrovit, kompozitorit maqedonas i cili kompozoi këngën serbe”, tha fillimisht Qaili për “News33”.
Ai akuzoi Dimitrovin për kontroll të plotë mbi jurinë profesionale.
“Në cilësinë e kompozitorit, nëpërmjet ndikimit të drejtorit të servisit publik, i cili është politik, e kanë kontrolluar jurinë”, deklaroi Qaili.
Sipas tij, shqiptarët nuk janë marrë asnjëherë parasysh dhe nuk u është lejuar që ta prezantojnë Maqedoninë e Veriut në këto lloj eventesh edhe kur maqedonasit nuk kanë pasur përfaqësues të denjë, po edhe për këtë ai, fajësoi politikën, respektivisht Qeverinë.
“Është manipuluar edhe televotingu, si lejon Evropa që një shtet “Maqedonia”, të votojë për këngë të kompozuar pikërisht nga një maqedonas” përfundoi Qaili.
