Pranvera është një antidepresiv natyral. Në organizmin dhe psikologjinë e njeriut ndikojnë orët më të gjata me dritë dielli, rigjallërimi i natyrës e ushqimi me fruta e perime duke i kthyer edhe tryezat tona në më të freskëta dhe detox.
Sipas studimeve të deritanishme rezulton se zgjatja e ditës përmirëson dukshëm humorin, mirëqenien dhe energjinë. Dopamina që është një neurotransmetues i lidhur me vëmendjen, motivimin, kënaqësinë dhe humorin e mirë sipas kërkimeve, rezulton se rritet e ndikuar pikërisht nga drita dhe ngrohtësia.
Por edhe frutat e stinës, veçanërisht luleshtrydhet, ndikojnë shumë jo vetëm në të ushqyerin shëndetshëm, por hidratojnë trupin, përmirësojnë humorin dhe ndikojnë kundër rrudhave.
Janë qindra studime të përmbledhura që vënë theksin tek psikologjia e mirë dhe lidhja me stinën e rizgjimit, që sillen në vëmendje më shumë pikërisht pas vitit pandemik më të rëndë dhe të vështirë për njeriun.
Sipas ekspertëve, shëtitjet dhe ushqimi duhen më shumë se kurrë për të ndihmuar veten, energjinë personale dhe të të tjerëve.
