Misioni vëzhgues i OSBE-OHDIR bëri këtë të premte daljen e parë publike, duke zyrtarizuar nisjen e procesit të monitorimit të zgjedhjeve të 25 Prillit. Kryesuesja e misionit, Ursula Gacek garantoi për një vëzhgim strikt dhe të paanshëm nga ekspertët ndërkombëtarë.
“Nuk jemi të interesuar për rezultatin politik. Jemi të interesuar si do të shkojë procesi, a do të jetë transparent, se sa këto zgjedhje do të jenë në përputhje më standardet ndërkombëtare. Për ta bërë punën siç duhet, do të flasim me shumë njerëz këtu”.
E pyetur rreth incidentit në Elbasan, ku u përplasën mbështetësit e mazhorancës dhe opozitës, kryevëzhguesja tha se misioni do të shprehet pasi të këtë marrë çdo informacion.
“Ne duam që të marrim çdo informacion lidhur me atë që ka ndodhur që të japim opinionin tonë. Kemi njerëz të ndryshëm që do të jenë në terren dhe do të merren me çdo çështje dhe problematikë. Vendet e nxehta nuk i dimë ende, por do të jemi kudo”.
Mënyrën e re të votimit, ku krahas partisë do të votohen edhe kandidatën e quan një sfidë për votuesit, ndaj kërkon informimin e tyre të plotë.
“Do të shohim çdo pajisje të procesit. Do të ketë një mënyrë të re votimi që do të jetë sfidë për votuesit, patjetër që do ta shohim nga afër edhe këtë çështje. Do të ketë program të veçantë për t’i mësuar ata mbi votimin ”.
Misioni i OSBE/ODIHR do të qëndrojë në Shqipëri deri në 17 Maj dhe pritet të dalë me tre raporte për zgjedhjet e 25 Prillit.
