Cristiano Ronaldo është larguar prej 3 vitesh nga Real Madrid, por sidoqoftë Lionel Messi ka përsëri rivalë të fortë në La Liga, sidomos sa i takon rasteve të krijuara për shënim.
I pari në këtë renditje është Toni Kroos, me gjermanin që ka krijuar 59 raste në total këtë sezon, më shumë se çdo futbollist tjetër në Spanjë. Argjentinasi i Barcelonës renditet i dyti deri në javën e 27 të La Ligas për rastet e krijuara, që janë 56.
Pas Kroos dhe Messit, renditet një emër surprizë, si David Ferreiro, i cili me fanellën e Huescas ka krijuar 48 raste. Njësoj me Ferreiron është edhe ylli i Celta Vigos, Iago Aspas, ndërsa vendi i pestë ndahet mes Ruben Garcia të Osasunës dhe Sergio Canales i Betisit, me nga 43 raste të krijuara.
Kroos ndoshta nuk shquhet për golat e shumtë, por është një nga lojtarët më stabël. Ai tashmë ka hyrë në historinë e Real Madrid. Ish-mesfushori i Bayern, që nënshkroi për Los Blancos në vitin 2014, tejkaloi Uli Stielike, duke u bërë futbollisti gjerman me më shumë ndeshje në historinë e klubit Los Blancos.
Me 312 ndeshje dhe me një kontratë deri në qershor 2023, 31-vjeçari Kroos ka shënuar 21 gola dhe dhënë 68 asiste. Gjatë karrierës Toni Kroos ka fituar 3 Champions League, 4 Botërore për Klube, 3 Super Kupa Europe, 2 kampionate dhe 2 Super Kupa në Spanjë.
