Konsiderohen si gjysma e bukurisë së portretit, por kujdesi për to shpesh fillon pasi shfaqen dhe problemet e para.
Probleme të cilat kryesisht kanë të bëjnë me rritjen e tyre apo rënien e shpeshtë.
Një njeri i shëndetshëm ka mesatarisht 80,000 deri në 120,000 fije floku, ku prej tyre 50 deri në 100 mund të bien çdo ditë.
Deri këtu sipas ekspertëve bëhet fjalë për një proces normal të organizmit si dhe faktorëve të jashtëm që ndikojnë trupin.
Pra rënia e flokëve është një proces tërësisht natyral, por problemi fillon kur kjo rënie është e shpeshtë dhe ndryshimet vihen lehtësisht re në pamjen tuaj.
Në këtë artikull nga AgroWeb.org do të flasim për të gjithë shkaqet që çojnë në humbjen e përhershme të tyre si dhe zgjidhjet më të sigurta e disa këshilla ekspertësh mbi këtë problem.
Çfarë ndikon në rënien e flokëve?
Me siguri keni dëgjuar një sërë arsyesh, nga stresi, tek krehja, kujdesi jo i duhur, faktorët gjenetikë, mosha, gjinia, apo shkaqet e ndryshme shëndetësore.
Shtatzënia, ndërhyrjet kirurgjikale, rëniet drastike në peshë dhe stresi kronik lënë pasoja direkte tek flokët.
Po ashtu medikamente të ndryshme, dëmtimet e jashtme apo mungesa e hekurit në organizëm.
Të gjithë këta faktorë së bashku apo secili prej tyre mund të shkaktojnë humbje serioze të flokëve dhe dëmtim të përhershëm të tyre.
Ndonëse është një fenomen që prek burrat në rreth 70% të rasteve, edhe gratë janë mjaft të ekspozuara.
Kjo pasi zakonisht kanë flokë më të gjatë të cilët kanë tendencën të këputen, përdorin më shumë mjete stiluese të cilat dëmtojnë flokun apo bojëra të mbushura me kimikate.
Ndryshimi i shpeshtë i ngjyrës së flokut nëpërmjet substancave kimike e shkatërron atë.
Tek burrat ndikojnë një sërë hormonesh të cilat lidhen me prodhimin e testosteronit dhe shkaktojnë humbje masive të fijeve të flokut.
Kështu kemi një ndryshim direkt në pamjen e jashtme e shpesh dhe në aspektin psikologjik.
Gjendur në këtë problem secili mendon një zgjidhje të shpejtë e sa më natyrale.
E në fakt këshilla e duhur do të ishte që fillimisht të ndryshoni stilin e jetesës e të praktikoni një regjim të shëndetshëm shëndetësor.
Trajtimet natyrale për forcimin e tyre gjithashtu mund të jenë një zgjidhje e momentit, por nëse problemi vjen nga ndonjë shkak i brendshëm me gjasë rënia nuk do të ndalet.
Si të rifitoni përgjithmonë flokët e humbur
Siç trajtuar edhe më lart, rënia e paevitueshme e flokëve shpesh është përfundimtare dhe e dukshme, ndaj është mirë të konsultoheni me një mjek specialist.
Një nga metodat më të sigurta e të dobishme për ta zgjidhur këtë problem një herë e mirë është mbjellja e flokëve.
Më të prekurit dhe më të favorizuarit për këtë trajtim janë meshkujt pas moshës 25 vjeç, kur dhe fillon rrallimi i flokëve në pjesën e përparme të kokës.
