Ka hyrë në fuqi ligji i ri, i publikuar në Fletoren Zyrtare si pjesë e paketës fiskale, i cili shtrin zyrtarisht aktivitetin ekonomik edhe në internet, duke përfshirë influencerët, blogerët dhe çdo individ që gjeneron të ardhura nga rrjetet sociale.
Sipas ndryshimeve ligjore, çdo person që fiton të ardhura online konsiderohet subjekt tregtar dhe është i detyruar të regjistrohet në Qendrën Kombëtare të Biznesit (QKB). Po ashtu, ata duhet të publikojnë në faqen apo profilin e tyre në rrjetet sociale të dhënat bazë të subjektit, si NIPT-in, emrin e biznesit, adresën dhe kontaktet.
Administrata Tatimore do t’i identifikojë këta individë kryesisht përmes të ardhurave të depozituara në llogaritë e tyre bankare. Pas identifikimit, do t’u dërgohet një njoftim zyrtar për formalizimin e aktivitetit.
Audituesi ligjor Avni Tobli shprehet se ky proces është i domosdoshëm dhe tashmë po zbatohet edhe në praktikë. Sipas tij, gjithnjë e më shumë influencerë po regjistrohen si subjekte tregtare, pasi edhe bizneset që bashkëpunojnë me ta kërkojnë fatura për pagesat e kryera.
Ligji parashikon masa të ashpra ndëshkuese për rastet e moszbatimit. Nëse brenda 15 ditëve nga marrja e njoftimit zyrtar individët nuk publikojnë të dhënat e kërkuara, Administrata Tatimore i kërkon AKEP-it bllokimin e llogarive të tyre në rrjetet sociale, si dhe vendosjen e gjobave administrative.
Sipas të dhënave zyrtare nga kontrollet e kryera, vetëm gjatë vitit 2025 janë identifikuar rreth 100 profile në rrjete sociale që kanë gjeneruar mbi 33 milionë euro të ardhura, të depozituara në llogari bankare individuale. Ekspertët theksojnë se këto shifra tregojnë rritjen e shpejtë të ekonomisë online, por edhe nivel të lartë informaliteti, të cilin ligji i ri synon ta formalizojë dhe ta fusë brenda sistemit tatimor.
