Shifrat zyrtare të INSTAT për periudhën 7-mujore tregojnë për një rritje prej 3.5% të numrit të turistëve të huaj, duke arritur në 6.5 milionë vizitorë. Por sipas kreut të Unionit Turistik Shqiptar Rrahman Kasa, turizmi detar nuk ka qenë në shifra të kënaqshme.
“Në qoftë se ne flasim për kategorinë e turistëve përveç plazhit, na rezulton me një rritje të lehtë sipas INSTAT. Në qoftë se flasim për kategorinë e turistëve bregdetar, ka një rënie, e cila krahasuar me vitin e kaluar është goxha e konsiderueshme. Kryesisht kjo rënie reflektohet në bregdetin e jugut”, tha Rrahman Kasa, kreu i Unionit Turistik Shqiptar.
Si shqetësim ai ngre edhe imazhin e vendit.
“Sivjet ne kemi një imazh i cili ka rënë në krahasim me vitin e kaluar. Mungesa e ujit pothuajse në shumë destinacione, prishjet që ndodhin në sezonin e verës, të cilat nuk janë një imazh i mirë, pavarësisht se mund të jenë shumë të domosdoshme, dhe rënia e imazhit ndonjëherë sjell rënie të biznesit.”
Por nga ana tjetër, Kasa tregon se vjeshta është premtuese edhe për turizmin detar, dhe si faktor kryesor veç atyre që duan më tepër qetësi, janë edhe çmimet më të ulëta.
“Shtatori realisht duket mirë dhe që është një plus i madh dhe besoj që kjo ka dy arsye: kanë rënë çmimet sepse i përkasin një fashe tjetër dhe infrastruktura rrugore ka trafik më të lehtësuar.”
Këtë vit ajo që vihet re është një rritje e numrit të turistëve gjermanë dhe anglezë, si dhe izraelitë.
