Serbia rrit pagën minimale në 550 euro nga 1 janari, a do të rritet në 500 euro paga minimale në Shqipëri?

Qeveria e Serbisë ka shpallur një tjetër rritje të pagës minimale, duke e çuar atë në 64,554 dinarë neto (rreth 551 euro) nga 1 janari 2026. Ky vendim vjen vetëm pak muaj pasi paga minimale do të ngjitet në nivelin e 500 eurove më 1 tetor të këtij viti, pas një rritjeje prej 9.4%. Në këtë mënyrë, Serbia do të ketë dy rritje të njëpasnjëshme brenda një periudhe të shkurtër, si rrjedhojë e presioneve sociale dhe ekonomike.

Negociatat mes palëve u karakterizuan nga tensione: punëdhënësit kërkuan të mos kishte rritje përtej 500 eurove, duke paralajmëruar kosto shtesë që rëndojnë mbi bizneset, ndërsa sindikatat kërkonin një minimum prej 590 eurosh, duke theksuar rritjen e ndjeshme të çmimeve të ushqimeve dhe energjisë. Qeveria gjeti një kompromis duke zgjeruar edhe bazën e të ardhurave që nuk tatohet me 20.4%, në mënyrë që të ulë barrën fiskale për kompanitë.

Rreth 90 mijë punonjës në Serbi paguhen me pagë minimale. Shporta bazë e konsumit kushtonte 475 euro në maj, ndërsa inflacioni vjetor i çmimeve të konsumit në korrik arriti në 4.9%. Për të zbutur pakënaqësitë, presidenti Aleksandar Vučić prezantoi masa shtesë, si kufizimi i marzheve të fitimit në ushqimet bazë dhe ulja e normave të interesit për kreditë konsumatore.

Shqipëria: nga 40 mijë lekë sot, drejt 500 eurove në 2026

Në Shqipëri, paga minimale aktuale është 40,000 lekë bruto, ose rreth 405-408 euro, më e ulëta në rajon sipas Eurostat. Kryeministri Edi Rama ka premtuar se nga 1 janari 2026 paga minimale do të bëhet 500 euro, një vendim që duhet të miratohej në qershor, por që deri tani nuk është marrë.

Sindikatat në Shqipëri prej kohësh kanë kërkuar harmonizimin e pagës minimale me kostot reale të jetesës, duke argumentuar se rritja e çmimeve ka ngritur nivelin e varfërisë. Krahasimi me vendet fqinje e bën edhe më të dukshme diferencën: Shqipëria ndodhet në vendet e fundit, padi lë pas vetëm Kosovën.

Rajoni: paga më e lartë në Mal të Zi, më e ulët në Kosovë

Në rajon, panoramën e pagave minimale e kryeson Mali i Zi, ku minimumi është rreth 670 euro, duke e bërë atë vendin me pagën më të lartë minimale në Ballkan. Në Serbi, pas rritjeve të fundit, paga do të arrijë mbi 550 euro nga janari. Maqedonia e Veriut ka vendosur një pagë minimale prej 584 eurosh, ndërsa Kosova ka miratuar pagën minimale prej 350 eurosh, që hyn në fuqi më 1 tetor 2025.

Ky hendek i dukshëm tregon sfidën e përbashkët të rajonit për të rritur standardin e jetesës, në një kohë kur inflacioni dhe krizat e njëpasnjëshme ekonomike kanë ulur fuqinë blerëse të qytetarëve.

Një garë për standardin

Rritjet e pagave minimale në rajon shihen si një përpjekje jo vetëm për të përmirësuar jetesën e qytetarëve, por edhe për të frenuar emigracionin, një problem i madh për të gjitha vendet e Ballkanit. Nëse Serbia tashmë ka hyrë në një cikël të shpejtë rritjesh, Shqipëria pritet të ndjekë të njëjtën rrugë duke e çuar minimumin në 500 euro nga fillimi i vitit të ardhshëm. Megjithatë, vendi mbetet i parafundit në listën rajonale deri në realizimin e këtij premtimi.

Në fund, betejat për pagën minimale në Ballkan nuk janë thjesht çështje ekonomike – ato përfaqësojnë një element kyç të stabilitetit social dhe politik, siç tregojnë protestat në Serbi apo debatet në Shqipëri. Rajoni po hyn në një fazë të re, ku paga minimale bëhet një nga mjetet kryesore për të matur vullnetin politik dhe për të siguruar mbështetjen e qytetarëve. /ekofin.al