Tirana do të jetë mikpritësja e Samitit të NATO-s në vitin 2027. Lajmin e bëri publik kryeministri Edi Rama përmes një postimi në rrjetet sociale, duke theksuar se vendimi u mor unanimisht gjatë samitit të zhvilluar më 24-25 qershor në Hagë.
“Samiti i NATO-s vendosi unanimisht zhvillimin e tij në Tiranë në vitin 2027”, shkroi Rama, duke publikuar edhe pamje nga takimi në Holandë.
Me këtë vendim, Shqipëria zyrtarizohet si vendi pritës i takimit më të rëndësishëm të aleancës ushtarake më të fuqishme në botë, që mbledh liderët e shteteve anëtare të NATO-s. Delegacioni shqiptar në Hagë u kryesua nga vetë kryeministri Rama.
Në deklaratën përfundimtare të samitit u konfirmua se pas takimit të vitit të ardhshëm që do të mbahet në Turqi, është radha e Shqipërisë të mirëpresë liderët botërorë. Pritet që në Tiranë të mbërrijnë udhëheqës të vendeve më të rëndësishme të NATO-s, përfshirë edhe presidentin amerikan Donald Trump.
