Greqia ka njoftuar masa më të rrepta kundër emigracionit të paligjshëm, duke planifikuar heqjen e një rregulli që më parë u lejonte emigrantëve të parregullt të aplikonin për leje qëndrimi pas shtatë vitesh.
Ministri i Migracionit, Makis Voridis, deklaroi se kjo praktikë është abuzuar dhe se “ata që ndodhen ilegalisht në Greqi nuk do të legalizohen kurrë”. Sipas tij, çdo vit në vend hyjnë ilegalisht rreth 60 mijë persona, ndërsa gjysma marrin azil.
Projektligji i ri parashikon dënime më të ashpra, përfshirë burg deri në 5 vjet për hyrje të paligjshme dhe zgjatje të kohës së paraburgimit para deportimit deri në 2 vjet.
Megjithatë, Greqia përballet me mungesë fuqie punëtore. Sipas Bankës së Greqisë, rreth 200,000 punëtorë i duhen ekonomisë. Prandaj, qeveria planifikon që deri në korrik të paraqesë rregulla të reja që do të lehtësojnë emigracionin e ligjshëm, veçanërisht për punë sezonale.
Ndërsa dera për emigracionin e paligjshëm mbyllet, ajo për punëtorët sezonalë mund të hapet – por me kushte të reja.
