Berati nuk është më thjesht një destinacion për turistët – me mbi 1 milion vizitorë sezonin e kaluar – por është shndërruar në një pikë referimi për mediat ndërkombëtare, të cilat e prezantojnë si një nga destinacionet më joshëse të Shqipërisë, tashmë i pranishëm në hartën globale të turizmit.
Një qytet i vogël me jehonë të madhe në botë
Time Magazine e përshkruan Beratin si një vend ku ndërthuren historia e pasur kulturore dhe mikpritja tradicionale. Artikulli vë në dukje trashëgiminë arkitektonike të qytetit, nga kishat bizantine te xhamitë dhe kalaja shekullore që dominon panoramën.
Le Monde trajton rritjen e Shqipërisë përmes turizmit dhe e sheh Beratin si një nga përfituesit më të mëdhenj të këtij zhvillimi, me theks te rritja e numrit të turistëve dhe përmirësimi i infrastrukturës mikpritëse.
The Sun e liston Shqipërinë si një alternativë të re pushimesh, ndërsa Beratin e përmend për çmimet e favorshme dhe ofertën e tij të pasur kulturore. Sipas tyre, qyteti ndodhet vetëm tre orë larg Mbretërisë së Bashkuar dhe është një zgjedhje ekonomike, por edhe e denjë për çdo turist.
Conde Nast Traveller bën një krahasim të bukur mes shtëpive të bardha të Beratit dhe atyre blu të Puglias, duke e përfshirë qytetin 2400-vjeçar në listën e destinacioneve “që s’duhet humbur”.
Lonely Planet shkruan: “Edhe pse sot është një nga qendrat më të vizituara të Shqipërisë, Berati ka ruajtur hijeshinë e vet të qetë dhe atmosferën mikpritëse”.
Slow Travel i bën thirrje çdo udhëtari të qëndrojë të paktën tri net në Berat, duke listuar aktivitetet dhe eksperiencat që ofron qyteti dhe duke sugjeruar rikthimin në të.
El Pais e quan Beratin “një thesar të fshehur të Ballkanit që pret të zbulohet”.
Ndërkohë, revista e mirënjohur La Revue du Vin de France ka renditur verërat shqiptare mes më të mirave në rajon, ku tre kantina nga Berati – Çobo, Alpeta dhe Pupa – përfaqësojnë pjesën më të madhe të listës. Qyteti njihet tashmë si qendra e verërave në Shqipëri, duke organizuar çdo vit Festivalin “Wine & Stories of Berat” që mbledh kantina nga i gjithë vendi dhe më gjerë.
Berati, fytyra e Shqipërisë turistike
Dhe ajo që e bën më të veçantë këtë qytet është fakti se shpesh përfaqëson Shqipërinë në artikuj promovues ndërkombëtarë. Fotot me shtëpitë e bardha e dritaret karakteristike të Beratit janë zgjedhja e parë për kopertinat që shoqërojnë shkrime mbi turizmin shqiptar – edhe kur artikulli flet për disa qytete, imazhi është kryesisht ai i Beratit.
Me një përzierje harmonike mes traditës, mikpritjes dhe zhvillimit modern, Berati vijon të jetë një nga destinacionet më të dashura për turistët dhe më të përmendura në media.
