45.34% e emigrantëve që janë regjistruar për të votuar nga jashtë vendit tashmë kanë dërguar zarfin me votën e tyre në Shqipëri.
Që prej datës 14 prill, kur ka nisur procesi i dërgimit të zarfeve për votim në diasporë, 111,557 emigrantë kanë kthyer votën e tyre në vend. Kjo shifër përfaqëson pjesën e atyre që i janë përgjigjur procesit nga 218,638 emigrantë që kanë marrë zarfet e dërguara nga Komisioni Qendror i Zgjedhjeve. Ndërkohë, rreth 25 mijë qytetarë ende nuk i kanë marrë zarfet e tyre.
Duke nisur nga sot, mbeten edhe 11 ditë afat, deri më 11 maj, ora 19:00, që afro 55% e fletëve të votimit të mbërrijnë në Shqipëri për t’u përfshirë në numërimin e përgjithshëm për çdo qark.
Në renditjen sipas vendeve, Italia kryeson me 20.6% të votave të dorëzuara, e ndjekur nga Gjermania me 6.5%, ndërsa Greqia, megjithëse po rrit ritmin, është aktualisht në kuotën e 5.6%.
Për transportin e fletëve të votimit, sipas marrëveshjes së KQZ me kompaninë DHL, nga vendet europiane dërgesat zgjasin 2-3 ditë pune, ndërsa nga vendet më të largëta, si SHBA apo Kanadaja, koha e mbërritjes mund të shkojë deri në 4 ditë.
