Pas një samiti me liderët evropianë, kryeministri britanik Keir Starmer njoftoi se Britania e Madhe, Franca dhe vendet e tjera po hartojnë një plan të përbashkët për ndalimin e luftës në Ukrainë, i cili do t’i paraqitet administratës amerikane.
“Qëllimi është të vendosim Ukrainën në pozicionin më të fortë të mundshëm tani. Çdo marrëveshje paqeje duhet të mbështetet nga forca dhe uniteti,” theksoi Starmer, duke shtuar se çdo vend duhet të kontribuojë sipas mundësive dhe të marrë pjesën e tij të përgjegjësisë.
Plani përmban katër pika kyçe:
1. Mbështetje e vazhdueshme ushtarake dhe presion ekonomik ndaj Rusisë, për të forcuar pozitat e Ukrainës.
2. Garantimi i sovranitetit dhe sigurisë së Ukrainës, me përfshirjen e drejtpërdrejtë të saj në çdo negociatë.
3. Forcimi i mbrojtjes afatgjatë të Ukrainës, edhe pas arritjes së një marrëveshjeje, për të parandaluar agresione të ardhshme.
4. Krijimi i një “koalicioni të gatshmëve”, që do të garantojë zbatimin e marrëveshjes dhe ruajtjen e paqes.
Ky propozim pritet të përcillet në Shtëpinë e Bardhë, me shpresën se do të ndihmojë në rikthimin e stabilitetit në rajon dhe do të krijojë një bazë të fortë për sigurinë evropiane.
