Është shtyrë sërish regjistrimi i popullsisë në Kosovë, i cili ishte vendosur të bëhej fillimisht në shtator, e më pas u shty për në nëntor dhe tani është caktuar për në muajin prill të vitit të ardhshëm.
Kryeministri Albin Kurti ka thënë se pas ndryshimit të menaxhmentit ka marrë një letër nga ushtruesi i detyrës së shefit të ri që “dëshmon se procesi nuk ka shkuar mirë”.
“Propozoj para jush që regjistrimi i popullsisë të shtyhet në periudhën prej 5 prillit deri më 17 maj të vitit 2024 për të zbatuar parimet e EUROSTAT dhe për t’i dhënë rast menaxhmetit të ri të tregojë efikasitet në kryerjen e përgjegjësive” tha Kurti.
Ai ka thënë se gabimet e të kaluarës më nuk do të përsëriten.
“Gjatë javës së kaluar kam përdorur autorizimin tim ligjor për të ndryshuar menaxhmentin e ASK-së, si një hap para për të rritur efikasitetin e procesit. Letra informuese që e kam pranuar nga u.d,. i ri i detyrës së drejtorit nga Avni Kastrati, dëshmon që procesi i regjistrimit nuk është menaxhuar mirë. Kësaj radhe është shtuar premtimi që gabimet nga e kaluara nuk do të përsëriten dhe se tashmë janë të qartë sa i përket mësimeve që kanë nxjerr”, shtoi ai.
