Kryeministri Edi Rama ka njoftuar shpalljen e konkursit ndërkombëtar të Qendrës Multifunksionale të Parkut Kombëtar të Vjosës. Përmes një postimi në rrjetet sociale, Rama shprehu bindjen se kjo nismë do t’i shërbejë rrugës së ngritjes në një nivel tjetër të këtij parku me potencial të jashtëzakonshëm.
“Në Ditën Botërore të Lumenjve, me kënaqësinë e shpalljes së konkursit ndërkombëtar të Qendrës Multifunksionale të Parkut Kombëtar të Vjosës, që do t’i shërbejë rrugës së ngritjes në një nivel tjetër të këtij parku me potencial të jashtëzakonshëm turistik”, shkruan Kryeministri.
Autoritetet shqiptare ftojnë grupet e interesuara që t’i bashkohen kësaj nisme për forcimin dhe promovimin e vlerave natyrore e kulturore që zotëron territori i lumit të fundit të egër në Europë siç është Vjosa.
Konkursi Ndërkombëtar i Dizajnit synon të bashkojë studiot më inovative dhe kreative të dizajnit nga të gjitha anët e globit.
