Rrjetet sociale kanë sjellë një profesion të ri tashmë, influencer. Postimet e kuruara, reklamimi i bizneseve te ndjekësit nga persona të caktuar për të sjellë më pas blerjen e produktit apo shërbimit që ofrojnë janë një prej formave të marketingut që kompanitë zgjedhin për të tërhequr klientët.
Por sa mund të fitojë një influencer? Arianita Petushi, drejtuese e agjencisë “Ahead Creative” ndan në “Jo Vetëm Modë” në Tv Klan shifrat që bizneset paguajnë për një influencer.
Orinda Huta: Çmimi më i ulët dhe çmimi më i lartë i një influencer-i, nga ato që keni punuar ju?
Arianita Petushi: Pak a shumë influencer-i me çmimin më të ulët është te vlera 200 Euro mund ta themi, një story apo një X të caktuar. Pastaj ka edhe në vlera, të cilat janë, unë dua të them jo për një postim, por janë disa influencer të cilët nuk pranojnë pa pasur një kontratë 6-mujore apo nuk pranojnë pa pasur një kontratë 1-vjeçare ku fillojnë dhe shkojnë në vlera 10 mijë Euro.
Orinda Huta: 10 mijë Euro si kontratë, jo vetëm për një postim, nuk përcaktohet e tillë. Një kontratë e plotë…
Arianita Petushi: Po, mos të them edhe më shumë, por nuk po i trembim bizneset.
Orinda Huta: Më thuaj cila ka qenë shifra e një influencer-i, më e larta?
Arianita Petushi: 10 mijë Euro.
Orinda Huta: Për sa muaj? Për një kontratë 6-mujore apo…
Arianita Petushi: Një kontratë 6-mujore.
