Meta Platforms ka paralajmëruar se do të njoftonte afërsisht 1 milion përdorues të Facebook se kredencialet e llogarisë së tyre mund të jenë komprometuar për shkak të problemeve të sigurisë me aplikacionet e shkarkuara.
Kompania njoftoi të premten se ka identifikuar më shumë se 400 aplikacione keqdashëse Android dhe iOS këtë vit që synojnë të vjedhin informacionin përdoruesve, kryesisht në Facebook. Meta tha se informoi Apple dhe Google për këtë çështje në mënyrë që të lehtësonte heqjen e aplikacioneve.
Aplikacionet zakonisht maskoheshin si editues fotografish, lojëra celulare ose gjurmues të shëndetit.
Apple tha se 45 nga 400 aplikacionet problematike ishin në App Store dhe janë hequr. Google hoqi të gjitha aplikacionet keqdashëse.
“Kriminelët kibernetikë e dinë se sa të njohura janë këto lloj aplikacionesh dhe ata do të rikrijojnë të tjera të ngjashme për të mashtruar njerëzit dhe për të vjedhur llogaritë dhe informacionin e tyre”, tha David Agranovich, drejtor në Meta.
Nëse një aplikacion premton diçka shumë të mirë për të qenë e vërtetë, si funksione të papublikuara diku tjetër, shanset janë që ai të ketë motive të fshehta, keqdashëse.
Si u vodhën të dhënat e Facebook?
Pasi shkarkohej aplikacioni, kërkohej të aksesohej përmes Facebook. Pra kërkoheshin të dhënat e Facebook për të hyrë në aplikacion.
Meta tha se do të ndajë këshilla me viktimat e mundshme se si mund të shmangin “rikompromentimin” duke mësuar se si të dallojnë më mirë aplikacionet problematike që vjedhin kredencialet, qoftë për Facebook apo llogari të tjera.
