Në pothuajse të gjithë vendin qytetarët nuk kanë mundur as këtë të hënë që të aplikojnë për pasaporta të reja dhe dokumente identifikimi. Shkak është bërë një problem në sistemin e Regjistrit Civil i cili është i lidhur me ALEAT. Qytetarët shprehen të shqetësuar që prej ditësh tanimë nuk po mund që të aplikojnë për dokumente identifikimi.
Qindra qytetarë u drejtuan në zyrat e ALEAT në mbarë vendin, për të aplikuar për dokument identifikimi dhe pasaportë.
Por, në shumë qytete të vendit ky shërbim nuk u ofrua as të Hënën.
Në zyrat e ALEAT në Vlorë, qytetarët pritën për orë të tëra, pa kryer punë.
Mësohet se probleme janë shfaqur në Regjistrin Civil Kombëtar, i cili duhet të lidhet me ALEAT për të bërë të mundur identifikimin biometrik të qytetarëve.
Më të vështirë e kishin emigrantët që kishin ardhur për të aplikuar për dokumente identifikimi.
“Kam ardhur nga Italia për të aplikuar. Që javën e kaluar kam ardhur kishte shumë njerëz, nuk ka sistem. Të premten ishte e mbyllur. Edhe sot sërish e njëjta gjë. Nuk na thonë gjë. Thjesht rrimë presim aty kur të vijë sistemi. Nuk të japin përgjigje,” tha një prej tyre.
Sistemi mungoi edhe në zyrtar e ALEAT në Shkodër, Gjirokastër, Sarandë, dhe Elbasan ndërsa në Korçë pas një mungese disaorëshe, u bë e mundur rikthimi i tij.
Ende nuk dihet nëse problemi ka lidhje me sulmet kibernetike me të cilat është përballur vendi ynë prej korrikut, ndërsa të premten e kaluar Ministria e Brendshme njoftoj se atë ditë sistemi do të fiket me qëllim forcimin e sigurisë kibernetike.
