Embrionë sintetikë të krijuar plotësisht në laborator. Këtë kanë arritur të bëjnë një grup shkencëtarësh britanikë dhe amerikanë, të cilët kanë zhvilluar disa embrione të ngjashme me ato të minjve pa ndihmën e spermatozoidëve dhe vezëve.
Sipas revistës shkencore Nature, embrionët patën rrahje zemre si dhe baza për formimin e organeve të tjerë, si truri, gjithçka falë qelizave staminale, të cilat mund të zhvillohen për të krijuar të gjitha llojet e organeve. Megjithatë, embrionët nuk jetuan më shumë se 8 ditë, për shkak të problemeve të mëdha në formim.
Megjithatë, grupi i shkencëtarëve nga Universiteti i Kembrixhit dhe Instituti i Teknologjisë në Kaliforni e konsideroi këtë një arritje të madhe që ka nevojë për përmirësime. Sipas tyre, me këtë mënyrë mund të kuptohen më mirë fazat e para të zhvillimit të organeve dhe mund t’i jepet përgjigje pyetjes, pse dështojnë shtatzënitë.
