Mbi 3600 infektime të reja dhe 6 humbje jete nga koronavirusi u shënuan në Shqipëri vetëm në 7 ditët e fundit. Për epidemiologun Ilir Alimehmeti një valë e tillë pandemike ishte e pritshme për shkak të nënvarianteve të Omicronit që janë në qarkullim.
“Rastet në realitet janë shumë më shumë se sa aq. Po të shifni pozitiviteti i testeve është 38%, por po të kishim bërë 5-fish më shumë teste do kishim më shumë raste. E prisnim sepse kemi nënvariantin BA5 në qarkullim që është nënvariant i Omicronit”, tha Alihmehmeti.
Po sipas tij nuk ka vend për panik për sa kohë situata spitalore mbetet e qëndrueshme.
“Në krahasim me Omicronin shkalla e hospitalizimit është rreth 4-fish më e ulët. Shumë persona e kanë kaluar dhe shume persona janë vaksinuar. Nëse ishte rreth 6% në fillim, më pas shkoi tek 3% me Deltën, 1.9% me Omicronin dhe tani jemi diku 1 – 1.6% të rasteve”, tha ai.
Aktualisht në spitalin Covid 3 në kryeqytet po trajtohen 23 pacientë. Në vendin tonë mbi 46% e popullatës janë vaksinuar me një dozë dhe 45,8% me dy doza. Ekspertët theksojnë si të rëndësishëm aplikimin e dozave përforcuese, pasi ka kaluar 5 muaj nga doza e dyte apo e tretë.
