Në Qendrat Shëndetësore mjekët pediatër po përballen me fluks vizitash. Shkak janë virozat që janë ende në qarkullim. Temperaturë e lartë, kollë e bajame me infeksion janë disa prej simptomave.
Edhe pse kemi hyrë në stinën e verës virozat vijojnë të jenë në qarkullim.
Javët e fundit mjekët thonë se janë përballur me fluks pacientësh të vegjël.
“Nëse flasim për virozat situata paraqitet me shtim virozësh për një periudhë 2-mujore”, thonë mjekët.
Sonila Brati, mjeke pediatre thotë se kjo virozë shkakton temperaturë të lartë te fëmijët. Tjetër karakteristikë janë edhe bajamet e infektuara.
“Ato që dominojnë janë infeksionet e rrugëve të sipërme respiratore dhe problemet e veshti, probleme me bajame të qelbëzuara. Po ashtu edhe probleme me rrugët e poshtme të frymëmarrjes”, thotë Brati.
Përveç moshave pediatrike të prekur janë edhe më të rriturit.
“Thuajse në këtë periudhë janë deri në 18 vjeç të prekurit, por edhe të rriturit”, tha ajo.
Mjekët këshillojnë që prindërit të tregojnë kujdes ndaj temperaturave të larta të stinës. Të mos i ekspozojnë fëmijët në orët e pikut ndërsa rekomandojnë që temperatura e mjediseve të brendshme të mos jetë më e ulët se 25 gradë.
