Është e njohur tashmë se sheqeri i tepërt është i dëmshëm për shëndetin tuaj. Por edhe zëvendësimi i tij me ëmbëlsues artificialë është gjithashtu e diskutueshme.
Debati është rindezur nga një studim në shkallë të gjerë, i rishikuar nga shkencëtarët në Francë, që sugjeron se konsumimi i ëmbëlsuesve artificialë mund të rrisë rrezikun e zhvillimit të kancerit.
Studiuesit francezë hulumtuan zakonet e të ngrënit dhe shëndetin e më shumë se 100,000 vullnetarëve gjatë një dekade.
Rezultatet e analizave të tyre statistikore, të publikuara javën e kaluar në revistën PLOS Medicine, sugjerojnë se njerëzit që konsumonin sasinë më të madhe të ëmbëltuesve artificialë – veçanërisht aspartam dhe acesulfame-K, të cilat zakonisht përdoren në pije joalkoolike – ishin në rrezik të shtuar të zhvillimit të kancerit.
Gjetjet ishin në përputhje me studimet e kaluara eksperimentale që sugjeronin një efekt të mundshëm kancerogjen te brejtësit.
Ëmbëlsuesit artificialë gjenden në shumë pije dhe produkte ushqimore në mbarë botën dhe konsumohen nga miliona qytetarë çdo ditë. National Cancer Institute në SHBA dhe Cancer Research në Mbretërinë e Bashkuar thonë se ëmbëlsuesit artificialë nuk shkaktojnë kancer.
Në të gjithë Bashkimin Evropian, përdorimi i tyre rregullohet nga Autoriteti Evropian i Sigurisë Ushqimore (EFSA). Agjencia aktualisht është duke përfunduar rivlerësimin e saj të të gjithë aditivëve ushqimorë të autorizuar për shitje në tregun e BE-së, duke përfshirë ëmbëlsuesit artificialë, tha një zëdhënës i EFSA për Euronews Next.
