Në Durrës janë identifikuar rastet e para të gripit të shpendëve, virus ky i njohur si H5N8.
Gripi i shpendëve është një sëmundje e shpendëve të egër, por prek gjithashtu shumë lloje shpendësh shtëpiake, përfshirë pulat, rosat, gjelat dhe patat.
Shkaktohet nga viruset e gripit të tipit A dhe ka disa nëntipe të viruseve të gripit që mund të infektojnë zogjtë, shkruan faqja focus.it
Po sipas medias italiane, ky grip prek edhe njerëzit, madje ka pasur ndër vite, raste infektimi që kanë ndodhur për shkak të kontaktit të drejtpërdrejtë me zogjtë e sëmurë ose të ngordhur që e kanë transmetuar virusin nëpërmjet pështymës, mukusit dhe feces.
Virusi, në fakt, mund të infektojë njerëzit përmes pikave të shpërndara në ajër dhe ose sipërfaqeve kontaminuese të prekura nga njerëzit, të cilët nuk mbajnë mjete mbrojtëse të përshtatshme si doreza ose maska të cilët më pas infektohen duke prekur gjërat e infektuara me duar, gojë, sy ose hundë.
Por në rastin e Shqipërisë, Ministria e Bujqësisë tha se nuk ka prova që mund t’u ngjitet njerëzve edhe pse këshilloi që mishi dhe vezët të gatuhen mirë. Disa muaj më parë, edhe ISHP deklaroi se: Rreziku nga H5N8 për të kaluar tek njerëzit është i ulët. Por produktet nga shpendët e oborrit mund të përdoren, por duke u gatuar shumë mirë.
