Mijëra makina Porsche dhe Volkswagen janë braktisur në një anije mallrash pasi ajo mori flakë në Oqeanin Atlantik, rrugës për në SHBA. Anija, e quajtur Felicity Ace, po udhëtonte nga Emden në Gjermani para se të mberthehej nga flakët në brigjet e ishujve Azores të Portugalisë.
Gazeta gjermane Handelsblatt raportoi se anija mbante 3,965 automjete, të cilat përfshinin gjithashtu Audi, Lamborghini dhe një numër të vogël Bentley.
Ekuipazhi i anijes është shpëtuar. Marina e Portugalisë tha se askush nuk u lëndua nga zjarri, i cili shpërtheu të mërkurën dhe 22 anëtarët e ekuipazhit u dërguan në një hotel pasi marina, katër anije tregtare që lundronin në zonë dhe Forcat Ajrore Portugeze përfunduan evakuimin.
“Pronari i anijes Felicity Ace është në kontakt me agjentin logjistik për të hartuar një plan për tërheqjen e anijes,” tha marina në një deklaratë. “Deri më tani nuk është regjistruar asnjë burim ndotjeje”.
