Bashkia e Tiranës ka menduar që të sjellë diçka të veçantë edhe këtë vit për ditën e të dashuruarve. Për të mësuar më tepër rreth organizimeve në kryeqytet për këtë ditë, i ftuar në edicionin e lajmeve ishte kryebashkiaku i natës për Tiranën, Rezart Cenaj.
“Ne si bashki si çdo vit kemi organizuar festën e Shën Valentinit, edhe këtë vit do të organizohet një koncert, për të kënduar këngët e dashurisë, në sheshin “Nënë Tereza”. Do të jenë të ftuar si Ronela Hajati, Mariza Ikonomi, Eranda Libohova, Urban Band, Devis Xherahu dhe secili këngëtar do të interpretojë këngët e tij të dashurisë. Tirana është zbukuruar më tepër këtë vit. Tirana është kryeqyteti i rinisë prandaj ky do të jetë një vit i mbushur me aktivitete kulturore, artistike dhe argëtuese. Në Tiranë pritet të interpretojnë artistë dhe zëra ndërkombëtar. Tirana këtë vit pret mijëra vizitorë nga vende të ndryshme të Evropës”,u shpreh kryebashkiaku i natës, Cenaj.
