Me këngë e valle, kështu kanë zgjedhur të protestojnë këta punonjës të sistemit shëndetësor kundër vendimit të qeverisë greke për ta bërë të detyrueshëm vaksinimin.
Sipas organizatorëve të protestës, punonjësit e pavaksinuar të kujdesit shëndetësor në Greqi llogaritet të janë rreth 5000. Protestuesit u panë me disa flamuj grekë të mbështjellë mbi supe. Ata brohoritën “Demokraci” ndërsa marshuan drejt parlamentit duke mbajtur pankarta ku shkruhej “Dje heronj, sot të pezulluar“.
“Ne kemi të drejtën, si individë të lirë në një vend demokratik, të bëjmë atë që duam me trupin tonë, të zgjedhim nëse do t’i nënshtrohemi një procedure mjekësore apo jo”.
Jashtë parlamentit, protestuesit nga Kreta që kishin sjellë me vete kostumet e tyre popullore, filluan të kërcejnë këngë tradicionale ndërsa protestuesit e tjerë bllokuan rrugën dhe duartrokitën. Punonjësit e sistemit shëndetësor të cilët nuk janë vaksinuar do të pezullohen pa pagesë. Sipas rregullave aktuale në Greqi të paimunizuarve u ndalohet hyrja në vende si restorante, muze dhe teatro.
