Ka reaguar Ervis Tushe, truproja i Sali Berisha pas aksidentit të ndodhur mbrëmë në autostradën Milot-Mamurras, ku u përfshi edhe makina e eskortës së ish-kryeministrit.
Tushe shkruan në rrjetet sociale se një makinë me targa të Kosovës ka qenë duke lëvizur kundravajtje dhe me shpejtësi, ndërsa falë shkathtësisë së shoferit, është bërë e mundur shmangia e përplasjes me automjetin ku ndodhej ish-kryeministri Sali Berisha.
Tushe thotë se Berisha ndodhet në gjendje të mirë shëndetësore, përfshirë edhe personat e tjerë pjesë e shoqërimit.
“Pas takimit në qytetin e Laçit, rreth orës 19:02, rrugës në kthim në autostradën Milot-Mamurras, në drejtimin tonë vjen një Mercedes i Bardhë 190 me targa të Kosovës, me shpejtësi në kundravajtje.
Falë aftësisë të shoferit të makinës së z. Sali Berisha u bë e mundur shmangia e menjëhershme e përplasjes, pasi makina në kundravajtje ishte me shpejtësi tej normave të lejuara, po kështu edhe dy makinat pas makinës së z. Berisha, ndërsa makina e tretë e ndodhur ballë për ballë ka bërë një frenim të fortë për ta shmangur ku si pasojë është goditur nga mbrapa nga një mjet rastësor.
E gjitha kjo ka ndodhur për shkak të shoferit që po i jepte makinës me shpejtësi në autostradë në korsinë e gabuar. Falë Zotit të gjithë jemi në gjendje të mirë shëndetësore, përfshirë doktor Berisha”, shkruan truproja Ervis Tushe.
