Është i trishtë dhe gati i pabesueshëm lajmi i ndarjes nga jeta të balerinës, këngëtares, prezantueses, piktores, autores dhe showgirl-it shqiptar Hueyda El Saied. Për fat të keq është i vërtetë!
Hueyda 46 vjeç, nënë e Gabrielit 6 vjeç, i mbylli sytë përgjithmonë në një spital të Francës.
Do të mbahet mend për buzëqeshjen e përhershme, për intervistat e sinqerta, për historinë e trishtë të prindërve të ndarë prej regjimit, për dashurinë e madhe për nonën (gjyshen) që e humbi një vit më parë, për deklaratat romantike për Thiery-n, për krenarinë për Gabrielin, për gjithçka që ka bërë dhe thënë, dhe për faktin se atë më të trishtën që i mori jetën, sëmundjen, e mbajti vetëm për vete.
Hueyda e nisi karrierën që e vogël fare, kur kërcente dhe këndonte si një nxënëse e shkollës “Jordan Misja”. Ajo ishte balerina hit, më e veçanta e “12 vallëzime pa një të shtunë”.
Më pas studioi jashtë, u rikthye në Shqipëri për të ikur e për t`u rikthyer në Francë ndër vite.
Veç karrierës në Shqipëri, Hueyda vallëzoi në shfaqjet televizive të ndryshme për këngëtarë dhe grupe: Lara Fabian, MOOS, Donna Summer, Nigel dhe Marvin, Larousso, Alizee, Sinclair, Etienne Daho, Florent Pagny, Paul Personne, Sniper, Jane Fostin, Sandy Valentino. Hueyda ka qenë gjithashtu balerinë e programit të njohur në Itali “In Bocca Al Lupo”. Të gjitha, në një kohë kur Shqipëria mund t`i shikonte veç nga televizori këto shfaqje. Dhe sigurisht të krenohej me vajzën shqiptare të cilën sot, përpara kohe, e ka humbur.
