Shumë njerëz janë adhurues të filmave horror, por për njerëzit me ankth, kjo kategori filmash mund të jetë më shumë se thjesht një hobi argëtues. Për disa, shikimi i filmave të frikshëm është në fakt një mënyrë e fuqishme për të menaxhuar simptomat e tyre të ankthit.
Duket paksa kontradiktore t’u drejtoheni përvojave të tmerrshme kinematografike kur keni shqetësime ose frikë të brendshme.
Ekspertët e shëndetit mendor shpjegojnë përse filmat horror pëlqehen dhe i ndihmojnë njerëzit që vuajnë nga ankthi?
Është një shpërqendrim i dobishëm
Për disa njerëz me ankth, filmat horror ofrojnë frikë konkrete ku mund të fokusojnë mendjen e tyre.
Njerëzit me ankth mendojnë për një sërë shqetësimesh në fusha të tilla si puna, familja, marrëdhëniet romantike, shëndeti, financat. Këta filma i ndihmojnë të shpërqendrohen nga sikletet e momentit, të së shkuarës e të së ardhmes. Përfshirja në komplotin e një filmi të frikshëm mund të jetë një shpërqendrim tërheqës ose rrugëdalje për ata që ndihen të zhytur nga shqetësimet personale.
Kanalizimi i ankthit të përditshëm në diçka më të fokusuar që ka të bëjë me diçka dhe dikë tjetër, duket se ofron një lehtësim nga ajo që po ndodh brenda tyre.
Ankthi vërtetohet ose normalizohet
Për disa njerëz me ankth, shikimi i një filmi horror është një mënyrë për të konfirmuar shkaktarët e shumtë të frikës me të cilën përballet rregullisht.
Ka njëfarë kënaqësie, ndoshta edhe lehtësim, që njerëzit me ankth ndjejnë kur shikojnë këto filma.
Në mënyrë paradoksale, filmat horror mund të normalizojnë simptomat e tyre dhe të dërgojnë mesazhin qetësues se: Po, ju jeni në ankth, por gjërat mund të jenë shumë më keq për dikë tjetër.
Ka një ndjenjë kontrolli
Ndërsa ankthi për shqetësimet e përditshme si puna, shëndeti ose marrëdhëniet mund të jetë dërrmues, ndjenja e ankthit që njerëzit përjetojnë kur shikojnë një film të frikshëm ndihet më shumë brenda fuqisë së tyre.
Filmat horror i lejojnë njerëzit e shqetësuar ta përjetojnë ankthin në një mënyrë të sigurt dhe të kontrolluar.
Ekspozimi mund të jetë një lloj terapie
Mjedisi i kontrolluar i shikimit të një filmi të frikshëm i ndihmon njerëzit me ankth të menaxhojnë emocionet intensive dhe të pakëndshme. Këta njerëz mund të kuptojnë se edhe pse zemra e tyre po rreh dhe muskujt janë të shtrënguar gjatë filmit, ata në fakt nuk janë në ndonjë rrezik.
Mund të jetë relaksuese
Shikimi i një filmi horror mund të jetë relaksues. McDonnell vuri në dukje se kur njerëzit janë në një gjendje ankthi, sistemet e tyre nervore përgjigjen dhe lëshojnë adrenalinë për të na mbrojtur nga rreziku i perceptuar.
Ana negative
Megjithëse shikimi i filmave horror mund t’i bëjë disa njerëz me ankth të ndihen më të relaksuar, ky mekanizëm duhet të përdoret me kujdes.
Është e mundur që filmat horror të kenë përmbajtje të frikshme që mund të shtojnë nivelet e ankthit. Për shembull, njerëzit që kanë ankth se diçka e keqe mund t`i ndodhë familjes së tyre, mund të ndihen më të shqetësuar ose të frikësuar pasi kanë parë një film horror ku një familje torturohej nga një i panjohur i frikshëm.
Një gjë që dihet me siguri për ankthin është se kur shmangim njerëzit, vendet ose situatat që shkaktojnë ankth, ankthi në fakt nuk përmirësohet. Do të përkeqësohet me kalimin e kohës. Gjëja më e mirë për të bërë është të përballeni me ankthin. Nëse nuk jeni të sigurt se si ta bëni këtë, kërkoni një klinicist të trajnuar.
