Java e vaksinimit masiv të studentëve vijon në të gjitha universitetet. Pikë vaksinimi për studentët është ngritur edhe pranë universitetit Politeknik të Tiranës.
Në këtë universitet duket se ka një interes më të lartë të të rinjve për t’u vaksinuar, madje ka patur edhe pedagog që janë vaksinuar pasi nuk ishin vaksinuar më herët.
Pavarësisht se janë kundër vaksinimit të detyruar shumë prej tyre kanë pohuar se po e bëjnë vaksinën pasi nuk mund të rrezikojnë të humbasin vitin akademik.
Në universitetin Politeknik janë vaksinuar rreth 32% e studentëve të regjistruar.
Pranë pikave të vaksinimit në fakultete ofrohen dy vaksina, AstraZeneca dhe Sinovac. Për shkak të kushteve të ruajtjes së vaksinës Pfizer, kjo vaksinë nuk ofrohet në pikat e ngritura pranë ambienteve universitare.
Të interesuarit që kërkojnë të bëjnë vaksinën Pfizer mund ta gjejnë pranë qendrave shëndetësore në kryeqytet dhe në pikën e vaksinimit masiv në stadiumin “Air Albania”.
Sipas udhëzimit të Ministrisë së Shëndetësisë në auditor mund të hyjnë vetëm studentët e vaksinuar përfshi edhe ata me një dozë. Deri më tani në vendin tonë janë administruar më shumë 1.8 mln doza vaksine anti-covid, prej të cilave 834 mijë persona i kanë marrë të dyja dozat.
