SHBA ngrin përpunimin e vizave për 75 shtete, përfshirë Shqipërinë dhe Kosovën.
Departamenti Amerikan i Shtetit po pezullon përpunimin e vizave emigratore për 75 vende, si pjesë e një përpjekjeje për të frenuar aplikantët që konsiderohen të rrezikuar të bëhen barrë për sistemin e ndihmave sociale.
Një memorandum i Departamentit të Shtetit, i siguruar fillimisht nga Fox News Digital, udhëzon oficerët konsullorë që të refuzojnë vizat sipas ligjit ekzistues, ndërsa departamenti rishikon procedurat e verifikimit dhe shqyrtimit të aplikantëve.
Në listë përfshihen vende si Somalia, Rusia, Afganistani, Brazili, Irani, Iraku, Egjipti, Nigeria, Tajlanda, Jemeni dhe shumë të tjera.
Pezullimi do të nisë më 21 janar dhe do të zgjasë për një periudhë të pacaktuar, deri sa Departamenti i Shtetit të përfundojë rishikimin e procedurave të përpunimit të vizave.
Somalia ka qenë nën vëzhgim të shtuar nga autoritetet federale pas një skandali të madh mashtrimi në shtetin e Minesotës, ku prokurorët zbuluan abuzime masive me programe të financuara nga taksapaguesit amerikanë. Shumë prej personave të përfshirë ishin shtetas somalezë ose amerikanë me origjinë somaleze.
Në nëntor të vitit 2025, një telegram i Departamentit të Shtetit dërguar ambasadave dhe konsullatave amerikane në mbarë botën urdhëroi zbatimin e rregullave të reja dhe më të ashpra të verifikimit sipas të ashtuquajturit kriter “barrë publike” në ligjin e emigracionit.
Sipas këtij udhëzimi, oficerët konsullorë duhet të refuzojnë vizat për aplikantët që vlerësohen se ka gjasa të varen nga ndihmat publike, duke marrë parasysh faktorë si shëndeti, mosha, njohja e gjuhës angleze, gjendja financiare dhe madje edhe nevoja e mundshme për kujdes mjekësor afatgjatë.
Personat e moshuar ose me mbipeshë, si dhe ata që kanë përfituar më parë ndihma financiare nga shteti ose kanë qenë të institucionalizuar, mund të përballen me refuzim të vizës.
“Departamenti i Shtetit do të përdorë autoritetin e tij të vjetër ligjor për t’i shpallur të papranueshëm emigrantët e mundshëm që do të bëhen barrë për Shtetet e Bashkuara dhe do të abuzojnë me bujarinë e popullit amerikan”, tha zëdhënësi i Departamentit të Shtetit, Tommy Piggott.
“Emigracioni nga këto 75 vende do të pezullohet ndërsa Departamenti i Shtetit rishikon procedurat për të parandaluar hyrjen e shtetasve të huaj që do të përfitojnë nga ndihmat sociale.”
Megjithëse kriteri “barrë publike” ekziston prej dekadash, zbatimi i tij ka ndryshuar ndjeshëm nga një administratë në tjetrën, me oficerët konsullorë që historikisht kanë pasur diskrecion të gjerë në vlerësim.
Përjashtimet nga ky pezullim do të jenë “shumë të kufizuara” dhe do të lejohen vetëm pasi aplikanti të ketë kaluar vlerësimin për rrezikun e varësisë nga ndihmat publike.
Një version i rregullit të “barrës publike” i miratuar në vitin 2022 gjatë administratës Biden kishte kufizuar llojet e përfitimeve që merren në konsideratë, kryesisht në ndihma në para dhe kujdes institucional afatgjatë, duke përjashtuar programe si SNAP (ndihma ushqimore), WIC, Medicaid apo kuponët e strehimit.
Ligji Amerikan i Emigracionit dhe Shtetësisë i lejon prej kohësh oficerët konsullorë t’i shpallin aplikantët të papranueshëm për arsye të “barrës publike”, por presidenti Donald Trump e zgjeroi këtë përkufizim në vitin 2019 për të përfshirë një gamë më të gjerë përfitimesh sociale. Ky zgjerim u sfidua në gjykatë dhe pjesërisht u bllokua, përpara se të shfuqizohej nga administrata Biden.
Lista e plotë e vendeve të përfshira përfshin: Afganistanin, Shqipërinë, Algjerinë, Antigua dhe Barbuda, Armeninë, Azerbajxhanin, Bahamas, Bangladeshin, Barbadosin, Bjellorusinë, Belizen, Butanin, Bosnje-Hercegovinën, Brazilin, Mianmarin (Burma), Kamboxhian, Kamerunin, Kepin e Gjelbër, Kolumbinë, Bregun e Fildishtë, Kubën, Republikën Demokratike të Kongos, Dominikën, Egjiptin, Eritrenë, Etiopinë, Fixhin, Gambinë, Gjeorgjinë, Ganën, Grenadën, Guatemalën, Guinenë, Haitin, Iranin, Irakun, Xhamajkën, Jordaninë, Kazakistanin, Kosovën, Kuvajtin, Kirgistanin, Laosin, Libanin, Liberinë, Libinë, Maqedoninë e Veriut, Moldavinë, Mongolinë, Malin e Zi, Marokun, Nepalin, Nikaraguan, Nigerinë, Pakistanin, Republikën e Kongos, Rusinë, Ruandën, Shën Kits dhe Nevis, Shën Luçinë, Shën Vincent dhe Grenadinet, Senegalin, Sierra Leonen, Somalinë, Sudanin e Jugut, Sudanin, Sirinë, Tanzaninë, Tajlandën, Togon, Tunizinë, Ugandën, Uruguajin, Uzbekistanin dhe Jemenin.
