Të dhënat e publikuara për herë të parë nga INSTAT mbi demografinë e ndërmarrjeve në Shqipëri, për periudhën 2021-2023, tregojnë se aktivitetet ekonomike janë dominuar nga tregtia me shumë e pakicë dhe riparimi i automjeteve dhe motoçikletave.
Sipas këtyre të dhënave, në vitin 2023 rezulton se numri i ndërmarrjeve aktive ishte 125.736; me 13.346 ndërmarrje të reja, ndërsa numri i ndërmarrjeve të mbyllura ishte 810.
Aktivitetet ekonomike me përqindjen më të madhe të ndërmarrjeve aktive gjatë vitit 2023 ishin tregtia me shumicë dhe me pakicë dhe riparimi i automjeteve dhe motorçikletave, me 35,2 %; akomodimi dhe shërbimi ushqimor me 14,3 %; aktivitete profesionale, shkencore dhe teknike me 7,9 %.
Ndërsa aktivitetet ekonomike me përqindjen më të lartë të punësimit gjatë 2023 krahas tregtisë me 21,8 % ishin edhe industria përpunuese me 15,5 %, si dhe ndërtimi me 9,1 %.
Po në këtë vit, tregtia dhe riparimi i automjeteve dominoi aktivitetet ekonomike me përqindjen më të madhe të ndërmarrjeve të reja me 26,2 % të ndjekur nga akomodimi dhe shërbimi ushqimor me 13,3 %; si dhe aktivitete profesionale, shkencore dhe teknike me 8,8 %.
Aktivitetet ekonomike me përqindjen më të lartë të punësimit të ndërmarrjeve të reja gjatë vitit 2023: tregtia me shumicë dhe me pakicë dhe riparimi i automjeteve dhe motoçikletave, me 20,9 %; akomodimi dhe shërbimi ushqimor me 14,0 %; ndërtimi me 11,2 %.
Gjatë vitit 2023, aktivitetet ekonomike me përqindjen më të madhe të ndërmarrjeve aktive sipas madhësisë së tyre, rezultuan 51,1 % e ndërmarrjeve aktive pa të punësuar me pagesë; 37,1% e ndërmarrjeve aktive rezultojnë me 1-4 të punësuar me pagesë; 5,4 % e ndërmarrjeve aktive rezultojnë me 5-9 të punësuar me pagesë; 6,4 % e ndërmarrjeve aktive rezultojnë me 10 ose më shumë të punësuar me pagesë.
