Kjo e premte është dita e fundit e fazës së dytë të regjistrimeve të nxënësve në klasën e parë dhe të dhjetë. Ndryshe nga vitet e kaluara, regjistrimi u bë online përmes portalit e-Albania, ku çdo prind apo kujdestar ligjor pasi hyn në llogarinë e tij në portal, duhet të plotësojë formularin e aplikimit, të përzgjedhë njësinë administrative, rrugën dhe shkollën që shfaqet në sistem.
Greta Selimi regjistroi nipin e saj në shkollën “Sabaudin Gabrani” dhe procesin e regjistrimit online nuk e konsideron të vështirë, përsa kohë ka akses në internet. Megjithatë, ajo sërish zgjedh të shkojë fizikisht.
Në shkollën “Sabaudin Grabani” ka pasur 400 kërkesa, por 160 është maksimumi i nxënësve që mund të regjistrohen. Në fazën e parë u pranuan 94 fëmijë, ndërkohë që në të dytën 152.
Drejtoresha e kësaj shkolle, Astasi Këri tregon se krahasuar me vitet e mëparshme, nuk ka pasur fluks prindërish në shkollë dhe sipas saj regjistrimi online ka ndihmuar në shmangien e gabimeve të mundshme. Gjithsesi, nënvizon se problemet nuk mungojnë.
“Prindërit më kërkues rezultojnë ata që regjistrojnë fëmijën e tyre të parë”, tha drejtoresha e shkollës “Sabaudin Gabranit”.
Të gjithë prindërit janë informuar dhe ndihmuar nga stafe të dedikuara në çdo shkollë, nëse kanë pasur probleme gjatë regjistrimit online, duke bërë që asnjë fëmijë të mos humbë vitin e parë shkollor për arsye të tilla.
