Presidenti i Shteteve të Bashkuara të Amerikës, Joe Biden, ka publikuar imazhin e parë që Teleskopi Hapësinor James Webb ka shkrepur. Imazhi në fjalë është postuar në rrjet fillimisht nga NASA dhe tregon sesi Universi dukej 13 miliardë vite më parë.
“Këto imazhe do t’i kujtojnë botës se Amerika mund të bëjë gjëra të mëdha dhe t’u kujtojë fëmijëve tanë se nuk ka asgjë përtej kapacitetit tonë. Ne mund të shohim gjëra që askush nuk i ka parë dhe të shkojmë në vende që askush nuk ka shkuar më parë. Amerika përkufizohet me një fjalë të vetme, mundësitë”, tha Biden.
Mediat e huaja shkruajnë se të hënën, (mëngjesin e së martës në Shqipëri), NASA prezantoi në një event të mbajtur në Shtëpinë e Bardhë, fotot e para të shkrepura nga teleskopi.
Gjithashtu bëhet e ditur se katër foto të tjera pritet të publikohen përgjatë ditës së sotme. Gjatë këtij eventi, presidenti amerikan foli për një moment historik për shkencën dhe teknologjinë.
Imazhi i parë është një paraqitje e shkurtër në thellësitë e Universit në dritën infra të kuqe. Teleskopi i fuqishëm u fokusua në një pjesë shumë të vogël të qiellit ku ndodhet grumbullimi i galaktikave SMACS 0723.
Çdo objekt i ndritshëm në foto është një galaktikë shumë e largët. Disa janë ndër më të largëtit që kemi vëzhguar ndonjëherë, kështu që ne po i shohim nga një kohë kur Universi ishte ende “i porsalindur”.
Kjo është fotografia më e qartë dhe më e detajuar që kemi për universin e hershëm. Teleskopit iu desh vetëm një ditë për të mbledhur dritën, një dëshmi kjo që tregon se sa i fuqishëm është. Siç shpjegoi drejtori i NASA-s Bill Nelson, kjo foto e veçantë mbulon një pjesë të Universit, proporcioni i së cilës është i ngjashëm me një kokërr rërë në një distancë sa një krah.
James Webb u nis në fund të vitit 2021 në hapësirë dhe ndodhet në një pikë rreth 1.5 milionë kilometra larg Tokës, me Tokën dhe Diellin pas saj. Pasqyra ka një diametër prej 6.4 metrash dhe përbëhet nga 18 pjesë gjashtëkëndore.
Javët e fundit, testet kanë përfunduar dhe të gjithë komponentët janë aktivizuar, duke lumturuar astronomët të cilët thonë se teleskopi 10 miliardë dollarësh po funksionon më mirë nga sa prisnin.
