Ekspozimi për një kohë të gjatë në diell dhe në temperatura të larta përbën shpesh rrezik për shëndetin, por më të riskuar janë ata që vuajnë nga problemet kardiake.
“Për meshkujt mbi 45 vjeç dhe për femrat mbi 55 vjeç sidomos për ato që kanë një sëmundje kardiovaskulare, pra kanë një diagnozë”, thonë mjekët.
Në verë janë të shumta rastet e infarkteve e sidomos në plazh. Mjeku kardiolog, Taulant Gishto teksa shpjegon arsyet thekson se më të rrezikuar janë të moshuarit.
“Ndodh tek ato që janë normal por si pasojë e ndryshimit të temperaturave pësojnë një mbledhje të arterjeve koronare në mënyrë të njëhershme të temperaturës nga i ngrohti në të ftohtë. Pra nga çadra shkojnë në ujë, uji është i ftohtë dhe kjo bëhet shkak për prodhimin e një infarkti akut ose të një aritmie të menjëhershme e cila i merr jetën individit në moment. Grupi tjetër janë individ që vuajnë nga zemra”, tha mjeku Gishto.
Kardiologu tregon disa mënyra se si mund të shmangen problemet kardiake në plazh gjatë ekspozimit në temperatura të larta.
“Duhet të parapërgatisin trupin përpara se të futen në ujë. Në momentin që një person futet në ujin e ftohtë duhet të ketë një përgatitje trupi në mënyrë që të mos ndjehet diferenca e madhe e temperaturës”, u shpreh ai.
Ndër të tjera specialistët rekomandojnë shmangien e orëve kur temperaturat arrijnë pikun dhe të konsumohen sa më shumë lëngje dhe fruta-perime.
